Cunha decidida aposta por contar historias universais dende pequenos microcosmos, esta nova aventura dos creadores de Qfwfq, Miguel Hernández, Romeo, Cyrano, Calisto e tantos outros, céntrase no intenso e extremo universo interpersoal elaborado ao longo dun prolongado secuestro. Como superar o medo, a inactividade, o encerro, o aburrimento, a falta absoluta de información, as diferenzas políticas e persoais, pechados nunha situación límite?

Rober, Ismail e Anik, europeos ligados ao mundo da cooperación, xunto a Amina, muller talibán convencida da súa situación, van superando as crise diarias grazas a unha mestura inestable de decisión, sentido común, loucura, humor, rabia, segredos, comunicación, tenrura e sorte. E á vez deixándonos entrever a trama da grosa tela xeopolítica na que están, e estamos todos envoltos.

Concibida dende unha concepción á vez comprometida e festiva do teatro, para a súa elaboración documentouse en relatos escritos por reféns reais (fundamentalmente: An evil cradling, de Brian Keenan, profesor irlandés catro anos e medio en poder de integrantes chiíes en Líbano; e Captive, de Jere Van Dyk, xornalista americano cativo dous meses nunha prisión talibán das montañas), así como en numerosas noticias e artigos diversos.

Pero escribiuse pensando fundamentalmente no teatro. En ofrecer un material rico ao actor e unha complicidade ao público, creando un texto escénico onde os sentimentos, as suxestións, o humor e a poesía tamén teñen cabida.

DOSSIER    CRÍTICA