O grupo ‘Candilejas Don Bosco’ naceu o 24 de maio de 1985 no Centro Calvo Sotelo da Coruña. Polo grupo pasaron máis de 350 mozos de idades comprendidas entre os 14 e os 30 anos.

Ningún dos compoñentes do grupo é profesional das artes escénicas. Vai sendo a experiencia de moitas horas de traballo ilusionado na maxia das táboas o que lles vai dando a seguridade dunha tarefa ben feita.

Dende o ano 1998 os integrantes do grupo Candilejas Don Bosco (ademais de seguir coas súas actuacións) tiveron a inquedanza de crear un Certame de Teatro Escolar e Afeccionado anual, porque consideran dita actividade unha ferramenta fundamental de axuda á formación integral da persoa. Un certame que goza dunha magnífica aceptación, reflectida no alto número de participantes, que durante tres meses, de marzo a xuño, representan as súas obras no Salón de Actos do Centro Calvo Sotelo.

Os soños que se fan realidade.

Con motivo do bicentenario do nacemento de Don Bosco, Candilejas tiña como reto presentarvos o musical: Jóvenes, paro, droga, sexo… y Don Bosco. Aquí tedes o resultado. Que gocedes del.